BdT 29.12 — Lancan vei fueilla e flor e frug

„Lancan vei fueilla e flor e frug“ von Arnaut Daniel (BdT 29.12): vollständiger Text, 45 Verse mit syntaktischer Annotation und Referenzbibliografie.

Arnaut Daniel — BdT 29.12

  1. Lancan vei fueilla e flor e frug
  2. parer dels arbres e·ill ramel'
  3. et aug lo chan que fan e·l brug
  4. ranas el riu, el bosc l'auzel,
  5. adonc mi fueilla e·m flor e·m frug'amors
  6. al cor tan gen que la nueg mi ressida
  7. can autra genz pauz'e dorm e soiorna.
  8. Er sai eu c'amors m'a condug
  9. el sieu plus segurain castel
  10. don no·i don renda ni trahug,
  11. ans m<i> a fag don et capdel:
  12. non ai poder ni cor que·m vir aillors,
  13. qu'enseniamenz e f<e>eutatz plevida
  14. lai per estar a bon faitz s'i atorna.
  15. Amors, de vos ai fag estug
  16. loniamen verai e fizel,
  17. cant no fiz ganda ni esdug
  18. d'amar, anz m'era bon e bel:
  19. e vos faitz me dels grans afanz socors,
  20. merces, d'aitan que Miels ai adelida
  21. don par soleils iusc'al ser po<s> s'aiorna.
  22. D'enian mi tuel e d'enuech fugh
  23. per l'amor ab que m'atropel,
  24. don ai un tal ver dig adugh
  25. re non sai que mentirs s'espel:
  26. oi mais pres eu 'n bel pauc lauzeniadors,
  27. per so qu'eu voil e·m vol sill c'ai cobida
  28. et eu sel soi que·ls sieus ditz non trastorna.
  29. Si l'auzes dir, ben sauron tug
  30. que iois mi monta·l cor al cel,
  31. car deportz mi creis e desdug
  32. la bella que d'amor apel:
  33. mon bon esper mi dobla sa valors,
  34. car qui mais val mais dopta far faillida
  35. ez il non es de re trista ni morna.
  36. D'aquest'amor so loin forduc
  37. domneador fenhen fradel,
  38. pero si·s n'an main pretz destrug
  39. tal que·s fn coinde ez isnel:
  40. et eu que soi dels leials amadors
  41. estau iauzens, c'amors e iois me guida
  42. lo cor en ioi que aillors no·s trastorna.
  43. Vai t'en, chanzos, a la bella de cors
  44. e dijas li c'Arnautz met en oblida
  45. tot'autra amor per leis vas cui s'atorna.