BdT 183.8 — Molt jauzens, mi prenc en amar

„Molt jauzens, mi prenc en amar“ von Guglielmo IX (BdT 183.8): vollständiger Text, 48 Verse mit syntaktischer Annotation und Referenzbibliografie.

Guglielmo IX — BdT 183.8

1. Molt jauzens, mi prenc en amar
2. un joi don plus mi vueill aizir;
3. e pos en joi vueill revertir,
4. ben dei, si puesc, al meils anar,
5. qu'al meils or n'an, estiers cujar,
6. c'om puesca vezer ni auzir.
7. Eu, so sabetz, no·m dei gabar
8. ni de grans laus no·m sai formir;
9. mas si anc negus jois poc florir,
10. aquest deu sobre totz granar
11. e part los autres esmerar,
12. si cum sol brus jorns esclarzir.
13. Anc mais no poc hom faissonar
14. cors, en voler ni en dezir
15. ni en pensar ni en consir;
16. aitals jois non pot par trobar,
17. e qui be·l volria lauzar,
18. d'un an no·i poiri'avenir.
19. Totz jois li deu humeliar
20. e tot'autr'amors oberzir,
21. midons, per son bel acuillir
22. e per son bel douset esgar:
23. e deu hom mai cent tans durar
24. qui·l joi de s'amor pot sazi.
25. Per son joi pot malaus sanar,
26. e per sa ira sas morir,
27. e savis hom enfolezir,
28. e belhs hom sa beutat mudar,
29. e·l plus cortes vilaneiar,
30. e·l totz vilas encortezir.
31. Pus hom gensor no·n pot trobar,
32. ni huells vezer, ni boca dir,
33. a mos obs la vueill retenir,
34. per lo cor dedins refrescar
35. e par la carn renovelar,
36. que no peusca envellezir.
37. Si·m vol midons s'amor donar,
38. pres soi del penr'e del grazir
39. e del celar e del blandir
40. e de sos plazers dir e far
41. e de son pretz tener en car
42. e de son laus enavantir.
43. Ren per autrui non l'aus mandar,
44. tal paor ai c'ades s'azir;
45. ni ieu mezeis, tan tem faillir,
46. non l'aus m'amor fort asemblar.
47. Mas ela·m deu mon meils triar,
48. pos sap c'ab lieis ai a guerir.