BdT 70.9 — Bel m’es can eu vei la brolha

«Bel m’es can eu vei la brolha» de Bernart de Ventadorn (BdT 70.9): text complet, 44 versos amb anotació sintàctica i bibliografia de referència.

Bernart de Ventadorn — BdT 70.9

  1. Bel m’es can eu vei la brolha
  2. reverdir per mei lo brolh
  3. e·lh ram son cubert de folha
  4. e·l rossinhols sotz lo folh
  5. chanta d’amor, don me dolh ;
  6. e platz me qued eu m’en dolha,
  7. ab sol qued amar me volha
  8. cela qu’eu dezir e volh.
  9. Eu la volh can plus s’orgolha
  10. vas me (mas oncas orgolh
  11. n’ac vas lei ?). per so m’acolha
  12. ma domna, pois tan l’acolh
  13. c’a totas autras me tolh
  14. per lei, cui Deus no me tolha ;
  15. ans li do cor qu’en grat colha
  16. so que totz jorns s’amor colh.
  17. S’amor colh, qui m’enpreizona
  18. per lei que mala preizo
  19. me fai, c’ades m’ochaizona
  20. d’aisso don ai ochaizo.
  21. tort n’a ; mas eu lo·lh perdo ;
  22. e mos cors li reperdona,
  23. car tan la sai bel’ e bona
  24. que tuih li mal m’en son bo.
  25. Bo son tuih li mal que·m dona ;
  26. mas per Deu li quer un do :
  27. que ma bocha, que jeona,
  28. d’un douz baizar dejeo.
  29. mas trop quer gran guizardo
  30. celei que tan guizardona ;
  31. e can eu l’en arazona,
  32. ilh me chamja ma razo.
  33. Ma razo chamja e vira ;
  34. mas eu ges de lei no·m vir
  35. mo fi cor, que la dezira
  36. aitan que tuih mei dezir
  37. son de lei per cui sospir ;
  38. e car ela no sospira,
  39. sai qu’en lei ma mortz se mira,
  40. can sa gran beutat remir.
  41. Ma mort remir, que jauzir
  42. no·n posc ni no·n sui jauzire ;
  43. mas eu sui tan bos sofrire
  44. c’atendre cuit per sofrir.