BdT 70.35 — Per melhs cobrir lo mal pes e·l cossi…

«Per melhs cobrir lo mal pes e·l cossire» de Bernart de Ventadorn (BdT 70.35): text complet, 46 versos amb anotació sintàctica i bibliografia de referència.

Bernart de Ventadorn — BdT 70.35

Per melhs cobrir lo mal pes e·l cossire
chan e deport et ai joi e solatz ;
e fatz esfortz car sai chantar ni rire,
car eu me mor e nul semblan no·n fatz ;
e per Amor sui si apoderatz,
tot m’a vencut a forsa, ses batalha.
Anc Deus no fetz trebalha ni martire,
ses mal d’amor, qu’eu no sofris en patz ;
mas d’aquel sui, si be·m peza, sofrire,
c’Amors mi fai amar lai on li platz ;
e dic vos be que s’eu no sui amatz,
ges no reman en la mia nualha.
Midons sui om et amics e servire,
e no·lh en quer mais autras amistatz
mas c’a celat los seus bels olhs me vire,
que gran be·m fan ades can sui iratz ;
e ren lor en laus e merces e gratz,
qu’el mon non ai amic que tan me valha.
Molt me sap bo lo jorn qu’eu la remire :
la boch’ e·ls olhs e·l fron e·ls mas e·ls bratz
e l’autre cors, que res no·n es a dire
que no sia belamen faissonatz.
gensor de leis no poc faire Beltatz,
per qu’eu m’en ai gran pen’ e gran trebalha.
A mo talen volh mal, tan la dezire,
e pretz m’eu mais, car eu fui tan auzatz
qu’en tan aut loc auzei m’amor assire,
per qu’eu m’en sui conhdes et ensenhatz.
e can la vei, sui tan fort envezatz :
vejaire m’es que·l cors al cel me salha.
Dins en mo cor me corrotz e·m azire,
car eu sec tan las mias volontatz. —
mas negus om no deu aital re dire,
c’om no sap ges com s’es aventuratz.
que farai doncs dels bels semblans privatz ?
falhirai lor ? mais volh que·l mons me falha !
Ab lauzengers non ai ren a devire,
car anc per lor no fo rics jois celatz.
e dic vos tan que per mon escondire
et ab mentir lor ai chamjatz los datz.
ben es totz jois a perdre destinatz
quez es perdutz per la lor devinalha.
Corona, man salutz et amistatz
e prec midons que m’ayut e me valha.
E quem volha, sia sens o foudatz,
no·m pot esser ni afans ni trebalha.