BdT 70.27 — Lonc tems a qu’eu no chantei mai

«Lonc tems a qu’eu no chantei mai» de Bernart de Ventadorn (BdT 70.27): text complet, 66 versos amb anotació sintàctica i bibliografia de referència.

Bernart de Ventadorn — BdT 70.27

  1. Lonc tems a qu’eu no chantei mai
  2. ni saubi far chaptenemen.
  3. ara no tem ploya ni ven,
  4. tan sui entratz en cossire
  5. com pogues bos motz assire
  6. en est so, c’ai . . . . . .
  7. si tot no·m vei flor ni folha,
  8. melhs me vai c’al tems florit,
  9. car l’amors qu’eu plus volh, me vol.
  10. Totz me desconosc, tan be·m vai ;
  11. e s’om saubes en cui m’enten,
  12. ni auzes far mo joi parven !
  13. del melhs del mon sui jauzire !
  14. e s’eu anc fui bos sofrire,
  15. ara m’en tenh per garit,
  16. qu’e re no sen mal que·m dolha.
  17. si m’a jois pres e sazit,
  18. no sai si·m sui aquel que sol !
  19. El mon tan bon amic non ai,
  20. fraire ni cozi ni paren,
  21. que, si·m vai mo joi enqueren,
  22. qu’ins e mo cor no·l n’azire.
  23. e s’eu m’en volh escondire,
  24. no s’en tenha per träit.
  25. no volh, lauzengers me tolha
  26. s’amor ni·m leve tal crit
  27. per qu’eu me lais morir de dol.
  28. C’ab sol lo bei semblan que·m fai
  29. can pot ni aizes lo·lh cossen,
  30. ai tan de joi que sol no·m sen,
  31. c’aissi·m torn e·m volv’ e·m vire.
  32. e sai be, can la remire,
  33. c’anc om belazor no·n vit ;
  34. e no·m pot re far que·m dolha
  35. Amors, can n’ai lo chauzit
  36. d’aitan com mars clau ni revol.
  37. Lo cors a fresc, sotil e gai,
  38. et anc no·n vi tan avinen.
  39. pretz e beutat, valor e sen
  40. a plus qu’eu no vos sai dire.
  41. res de be no·n es a dire,
  42. ab sol c’aya tan d’ardit
  43. c’una noih lai o·s despolha,
  44. me mezes, en loc aizit,
  45. em fezes del bratz latz al col.
  46. Si no·m aizis lai on ilh jai,
  47. si qu’eu remir son bel cors gen,
  48. doncs, per que m’a faih de nien ?
  49. ai las ! com mor de dezire !
  50. vol me doncs midons aucire,
  51. car l’am ? o que lh’ai falhit ?
  52. ara·n fassa so que·s volha
  53. ma domna, al seu chauzit,
  54. qu’eu no m’en planh, si tot me dol.
  55. Tan l’am que re dire no·lh sai ;
  56. mas ilh s’en prend’ esgardamen,
  57. qu’eu non ai d’alre pessamen
  58. mas com li fos bos servire.
  59. e s’eu sai chantar ni rire,
  60. tot m’es per leis escharit.
  61. ma domna prec que m’acolha,
  62. e pois tan m’a enriquit,
  63. no sia qui dona, qui tol.
  64. De cor m’a, coras se volha.
  65. ve·us me del chantar garnit,
  66. pois sa fin’amors m’o assol.