BdT 70.22 — Ja mos chantars no m’er onors

«Ja mos chantars no m’er onors» de Bernart de Ventadorn (BdT 70.22): text complet, 64 versos amb anotació sintàctica i bibliografia de referència.

Bernart de Ventadorn — BdT 70.22

  1. Ja mos chantars no m’er onors
  2. encontral gran joi c’ai conques,
  3. c’ades m’agr’ ops, si tot s’es bos,
  4. mos chans fos melher que non es.
  5. aissi com es l’amors sobrana,
  6. per que mos cors melhur’ e sana,
  7. deuri’ esser sobras lo vers qu’eu fatz
  8. sobre totz chans, e volgutz e chantatz.
  9. Ai Deus, can bona for’ amors
  10. de dos amics, s’esser pogues
  11. que ja us d’aquestz enveyos
  12. lor amistat no conogues !
  13. Cortezia, mout etz vilana
  14. c’ad aquesta fausa gen vana
  15. fatz conoisser semblans ni amistatz,
  16. c’ar’ es cortes lo plus mal essenhatz !
  17. Per merce prec als amadors,
  18. chascus per se cossir e pes
  19. del segle com es enoyos
  20. e can pauc n’i a de cortes !
  21. c’amors, pois om per tot s’en vana,
  22. non es amors, mas es ufana,
  23. et es enois, vilani’ e foudatz,
  24. qui no gara cui deu esser privatz.
  25. Si tot m’es vergonh’ e paors,
  26. blasmatz m’er d’Amor ; mas be·m pes,
  27. car aquest lauzars no m’es pros
  28. (e pois mos conortz no·n es res) ;
  29. qu’eu vei que de nien m’apana
  30. cilh que no·m vol esser umana ;
  31. e car no·n posc aver joi ni solatz,
  32. chan per conort cen vetz que sui iratz.
  33. Chauzit ai entre las melhors
  34. la melhor qued anc Deus fezes ;
  35. mas tan a va cor e doptos
  36. qu’er’ ai leis, era no·n ai ges.
  37. que val aitals amors aurana,
  38. can ges no pot una setmana
  39. us bos amics ab l’autr’ estar en patz
  40. ses grans enois e ses enemistatz ?
  41. Tostems sec joi ir’ e dolors
  42. e tostems ira jois e bes
  43. (et eu no cre, si jois no fos,
  44. c’om ja saubes d’ira que·s es) ;
  45. qu’eu pert per falsa laus umana
  46. tal joi de fin’ amor certana
  47. que, qui·m mezes tot lo mon ad un latz,
  48. en preira·l joi per cui sui enjanatz.
  49. Bela domna, vostre socors
  50. m’auria mester, se·us plagues,
  51. que molt m’es mal’ aquist preizos,
  52. en c’Amors m’a lassat e pres.
  53. a Deus ! can malamen m’afana,
  54. can so que·m träis e m’enjana
  55. m’aven amar, si tot me pez’ o·m platz !
  56. era sai eu qu’eu sui apoderatz.
  57. . . . . . . . . . . . . . . . . . . . . . . . . .
  58. . . . . . . . . . . . . . . . . . . . . . . . . .
  59. car de l’afan no me val amistatz
  60. tan qu’eu disses que sui melhs sos privatz.
  61. Messatgers, vai t’en via plana
  62. a mon Romeu, lai vas Viana,
  63. e digas li qu’eu lai fora tornatz,
  64. si mos De-Cor m’agues salutz mandatz.