BdT 389.9 — Anz que l’haura bruna·s cal

«Anz que l’haura bruna·s cal» de Raimbaut d'Aurenga (BdT 389.9): text complet, 54 versos amb anotació sintàctica i bibliografia de referència.

Raimbaut d'Aurenga — BdT 389.9

  1. Anz que l’haura bruna·s cal  
  2. gir un vers d’amon d’aval;   
  3. q’ist mei guerrer maladrei   
  4. si fan de gabar vassal,      
  5. e cujon se q’est caval,      
  6. c’ai perdut, m’aion destrei. 
  7. Ja per so uns non guabei     
  8. si·m perd; e demostrar n’ei  
  9. q’emqeras em tug el bal.     
  10. Anc ogan de l’autre frei     
  11. farai tornar tal nevei       
  12. al mestier Bernart del Gal.  
  13. Segnior, eu no soi ges ducs, 
  14. ni no veg can tenc sol ducs; 
  15. ni de lop ni de lairon       
  16. no·s pot gardar desastrucs,  
  17. qon fai cel qe es els sucs:  
  18. tost a emblar conoisson!     
  19. Ben sap cel de Meolhon       
  20. s’ieu fas en, tant con el fon,
  21. o·N Bertran dels Bauz, o·N Ucs;
  22. jamais non tengran blizon,     
  23. mas fait cujon aver pron       
  24. car ni von cau con sambucs.    
  25. Anc pois no·ls tinc per onratz 
  26. po·l camps fo desamparatz      
  27. per els senes colp de bran!    
  28. Dels cavalers la meitatz       
  29. degron tener los valatz:       
  30. q’il eron be seis aitan!       
  31. Segnior, ben sai q’en estan    
  32. ani’ a penr’ un sol dan.       
  33. Mas ar soi outrapassatz        
  34. et estortz d’aqel afan         
  35. per q’eu nau era doptan.       
  36. Ar serai abandonatz!           
  37. Anc, pos a ma dona plac        
  38. qe·m volgues mal, gaug non ac; 
  39. ni jamais no·m deu parer       
  40. be, pos eu mezeis m’estrac.    
  41. E qi no·m tengues per flac     
  42. tot joi laissera cazer.        
  43. Mas Dieus no saub hanc voler   
  44. c’om de tot se desesper;       
  45. per qe·m tenc, e si m’esmac,   
  46. donna, car ben cud saber       
  47. qe jamais no·us an vezer;      
  48. mas ges per tant no·m estrac.  
  49. Trobat, per so no m’estrac:    
  50. car mos cors, si ben n’esmac,  
  51. no m’en daria poder.           
  52. Esperat ai et esper            
  53. merce, si·us ven a plazer,     
  54. donna, per qe no·m n’estrac.