BdT 389.36 — Pois tals sabers mi sortz e·m creis

«Pois tals sabers mi sortz e·m creis» de Raimbaut d'Aurenga (BdT 389.36): text complet, 64 versos amb anotació sintàctica i bibliografia de referència.

Raimbaut d'Aurenga — BdT 389.36

1. Pois tals sabers mi sortz e·m creis   
2. que trobar sai — et ieu o dic! —      
3. mal estara si non pareis              
4. et er mi blasmat si m’en gic;         
5. car so qu’om van’ ab la lenga         
6. taing ben que en pes lo tenga,        
7. car non pot aver pejor dec            
8. qui ditz so que no s’avenga.          
9. Er ai gaug car sebram dels freis      
10. e remanon sol li abric;               
11. li auzellet — et es lor leis          
12. qe negus de chantar no·is gic —       
13. us quecs s’alegr’ en sa lenga         
14. pel novel temps que·il sovenga;       
15. e dels arbres qu’eron tuit sec        
16. lo foils pels branquils s’arenga.     
17. E qui anc jorn d’amar si feis         
18. non taing q’era s’en desrazic         
19. c’ab lo novel temps que s’espreis     
20. deu quecs aver son cor plus ric;      
21. e qui non sap ab la lenga             
22. dir so que·il coven, aprenga          
23. consi ab novel joi s’esplec:          
24. c’aisi vol Pretz que·s captenga.      
25. Estat ai fis amics adreis             
26. d’una que·m enganav’ ab tric,         
27. e car anc s’amors mi destreis,        
28. tos temps n’aurai mon cor enic;       
29. qu’aras non voill qu’ab sa lenga      
30. auir lo digz que·m destrenga          
31. per so qu’autre ab lieis s’abrec      
32. et eu caz so q’aicel prenga.          
33. Ab leis remanga·l malaveis            
34. e·l engans et ab son amic;            
35. que tals joys m’a pres e m’azeis      
36. dont ja non creirai fals prezic:      
37. anz voill c’om mi tail la lenga       
38. s’ieu ja de leis crei lausenga        
39. ni de s’amor mi desazec,              
40. s’ie·n sabia perdr’ Aurenga.          
41. Ben taing qu’eu sia fis vas leis      
42. car anc mais tant en aut non cric.    
43. Que Nostre Seigner, el mezeis,        
44. ab pauc de far non i faillic;         
45. c’apenas saup ab la lenga             
46. dir “Aital vuoill que devenga”;       
47. qu’a la beutat qu’en leis assec       
48. non volc c’autra s’i espenga.         
49. Domna, no·us sai dir loncs plaideis,  
50. mas far de mi podetz mendic           
51. o plus ric que anc no fon reis;       
52. del tot sui en vostre castic!         
53. Sol vos digatz ab la lenga            
54. consi voletz que·m captenga;          
55. qu’eu ai cor qu’enasi estec,          
56. e que ja d’autra no·m fenga!          
57. Domna, no·us quier ab la lenga        
58. mas qu’en baisan vos estrenga         
59. en tal luoc on ab vos m’azec,         
60. e que d’ams mos bratz vos senga.      
61. Levet, fai auzir ta lengua            
62. en cuy beutatz se depenga;            
63. c’aia tal vers selha qu’ieu dec       
64. per so que de mi·l sovenga.