BdT 389.27 — Entre gel e vent e fanc

«Entre gel e vent e fanc» de Raimbaut d'Aurenga (BdT 389.27): text complet, 61 versos amb anotació sintàctica i bibliografia de referència.

Raimbaut d'Aurenga — BdT 389.27

1. Entre gel e vent e fanc          
2. e giscl’ e gibr’ e tempesta      
3. e·l braus pensars que·m turmenta 
4. de ma bella dompna genta         
5. m’an si mon cor vout en pantais  
6. c’ar vauc dretz e sempre biais;  
7. cen ves sui lo jorn trist e gais.
8. E ges tres deniers no·m planc    
9. l’ivern, anz m’o tenc a festa    
10. — ves c’ai voluntat dolenta —.   
11. Car de mi donz la plus genta,    
12. pos saup qu’en trop·amar nos trais
13. cel’amors que·m sol tener frais,  
14. o·l plaira que m’ai’ o que·m lais.
15. Dompn’ ab cor cortes e franc,     
16. ar m’es pujat en la testa         
17. que sapcha que·us n’atalenta.     
18. Ai! Douza res car’ e genta!       
19. Per Dieu, no·s fraingna nostre jais! 
20. Sol remembre vos del douz bais!      
21. Ar o laissarai, s’ie·n dic mais.     
22. Que sempre·m tornon l’oil blanc,     
23. e·l cors, qu’est esglai mi presta,   
24. fail tro c’om la cara·m venta        
25. can mi soven, dompna genta,          
26. com era nostre jois verais           
27. tro lauzengiers crois e savais      
28. nos loigneron ab lor fals brais.   
29. Lauzengier, ren non vos tanc!      
30. Qu’eu non sui d’aquella gesta,     
31. s’anc fui. Ves, Amors gauzenta?    
32. E no i taing mais, Amors genta;    
33. que s’amava cel que retrais        
34. so don me nais aquest esglais      
35. no·il faria enog ni fais.          
36. Que — si·m sal Dieus! — non aic anc, 
37. que mos cors m’o amonesta,           
38. sor, cozina, ni parenta              
39. s’amar volc de guiza genta           
40. c’anc de mi s’i gardes ni·s tais;    
41. qu’ie·n valria·ls Turcs part Roais   
42. d’amar, se lor n’era en ais.         
43. E, dompna, car tant m’estanc?        
44. Qu’eu no·us veg, per als non resta   
45. mais tem — c’aisso·m n’espaventa —   
46. c’a vos fos dans, dompna genta.      
47. Mas mandatz mi per plans essais,     
48. per tal cobrir sol sapcha·l cais!    
49. Qu’eu irai lai de grant eslais.      
50. Qu’ie·n pert la color e·l sanc       
51. tal talent ai que·m desvesta         
52. c’ab vos fos ses vestimenta          
53. aissi com etz la plus genta;         
54. que tan grans voluntatz m’en nais    
55. qu’en un jorn — tan ben c’om no·m pais —
56. en pert so que d’un mes engrais.        
57. Dompna, renovell nostre jais            
58. si·us platz; que viu, si be·m fas gais, 
59. ab manz durs doloiros pantais.          
60. Joglar, vos avetz pro oimais,           
61. et eu planc e sospir et ais.