BdT 389.16 — Ar resplan la flors enversa

«Ar resplan la flors enversa» de Raimbaut d'Aurenga (BdT 389.16): text complet, 52 versos amb anotació sintàctica i bibliografia de referència.

Raimbaut d'Aurenga — BdT 389.16

1. Ar resplan la flors enversa             
2. pels trencans rancx e pels tertres.     
3. Cals flors?  Neus, gels e conglapis     
4. que cotz e destrenh e trenca;            
5. don vey morz quils, critz, brays, siscles
6. en fuelhs, en rams e en giscles          
7. mas mi ten vert e jauzen Joys            
8. er quan vey secx los dolens croys.       
9. Quar enaissi m’o enverse                 
10. que bel plan mi semblon tertre,          
11. e tenc per flor lo conglapi,             
12. e·l cautz m’es vis que·l freit trenque,  
13. e·l tro mi son chant e siscle,           
14. e paro·m fulhat li giscle.               
15. Aissi·m suy ferm lassatz en joy          
16. que re non vey que·m sia croy —          
17. mas una gen fad’ enversa                 
18. (cum s’eron noirit en tertres)           
19. que·m fan pro pieigz que conglapis;      
20. q’us quecx ab sa lengua trenca           
21. e·n parla bas et ab siscles;             
22. e no y val bastos ni giscles             
23. ni menassas; — ans lur es joys           
24. quan fan so don hom los clam croys.      
25. Qu’ar en baizan no·us enverse            
26. no m’o tolon pla ni tertre               
27. dona, ni gel ni conglapi,                
28. mas non·poder trop en trenque.           
29. Dona, per cuy chant e siscle,            
30. vostre belh huelh mi son giscle          
31. que·m castion si·l cor ab joy            
32. qu’ieu no·us aus aver talan croy.        
33. Anat ai cum cauz’ enversa                
34. sercan rancx e vals e tertres,           
35. marritz cum selh que conglapis           
36. cocha e mazelh’ e trenca:                
37. que no·m conquis chans ni siscles        
38. plus que folhs clercx conquer giscles.   
39. Mas ar — Dieu lau — m’alberga Joys       
40. malgrat dels fals lauzengiers croys.     
41. Mos vers an — qu’aissi l’enverse,        
42. que no·l tenhon bosc ni tertre —         
43. lai on hom non sen conglapi,             
44. ni a freitz poder que y trenque.         
45. A midons lo chant e·l siscle,            
46. clar, qu’el cor l’en intro·l giscle,     
47. selh que sap gen chantar ab joy          
48. que no tanh a chantador croy.            
49. Doussa dona, Amors e Joys                
50. nos ajosten malgrat dels croys.          
51. Jocglar, granren ai meynhs de joy!       
52. Quar no·us vey, en fas semblan croy.