BdT 293.6 — Amics Marchabrun, car digam

«Amics Marchabrun, car digam» de Marcabru (BdT 293.6): text complet, 56 versos amb anotació sintàctica i bibliografia de referència.

Marcabru — BdT 293.6

  1. Amics Marchabrun, car digam
  2. un vers d’amor, que per cor am,
  3. q’a l’hora qe nos partiram
  4. en sia loing lo chanz auziz.
  5. Ugo Catola, er fazam,
  6. mas de faus’ amistat me clam,
  7. q’anc pos la serps baissa lo ram
  8. no foron tant enganairiz.
  9. Marcabrun, ço no m’es pas bon,
  10. qe d’amor digaz si ben non:
  11. per zo·us en move la tenzon
  12. qe d’amor fui naz e noiriz.
  13. Catola, non entenz razon:
  14. non saps d’amors cum trais Samson?
  15. Vos cuidaz e·ill autre bricon
  16. qe tot sia ver qant vos diz.
  17. Marcabrun, nos trobam auctor
  18. de Sanso·l fort e de sa uxor,
  19. q’ela n’avia ostat s’amor
  20. a l’ora q’el en fo deliz.
  21. Catola, qar a sordeior
  22. la det e la tolc al meillor:
  23. lo dia perdet sa valor
  24. qe·l seus fo per l’estraing traïz.
  25. Marcabrun, si cum declinaz
  26. qu’amors si’ ab engan mesclaz,
  27. dunc es lo almosna pechaz,
  28. la cima devers la raïz.
  29. Catola, l’amors dont parlaz
  30. camja cubertament los daz:
  31. aprop lo bon lanz vos gardaz,
  32. ço dis Salomons e Daviz.
  33. Marcabrun, amistaz dechai,
  34. car a trobat joven savai!
  35. Eu n’ai al cor ira et esclai
  36. q’ar l’en alevaz tan laiz criz.
  37. Catola, Ovides mostra chai
  38. – e l’ambladura o retrai –
  39. qe non soana brun ni bai,
  40. anz se trai plus aus achaïz.
  41. Marchabrun, anc non cuit t’ames
  42. l’amors – ves cui es tant engres –
  43. ni no fo anc res meinz prezes
  44. d’aitals joglars esbaluïz.
  45. Catola, anc de ren non fo pres
  46. un pas qe tost no s’en loignes,
  47. et enqer s’en loingna ades,
  48. e fera tro seaz feniz.
  49. Marcabrun, qant sui las e·m duoill,
  50. e ma bon’ amia m’acuoill
  51. ab un baissar qant me despuoill,
  52. m’en vau sans e saus e gariz.
  53. Catola, per amor deu truoill,
  54. tressaill l’avers al fol lo suoill,
  55. e puois mostra la via a l’uoill
  56. aprop los autres escharniz.