BdT 293.5 — El son d’esviat chantaire

«El son d’esviat chantaire» de Marcabru (BdT 293.5): text complet, 56 versos amb anotació sintàctica i bibliografia de referència.

Marcabru — BdT 293.5

1. El son d’esviat chantaire
2. veirai si pusc un vers faire
3. de fals’amistat menuda,
4. c’aissi leu pren e refuda,
5. puois sai ven e lai mercada,
6. e morrai si no·m n’esclaire.
7. Cest’amors sap engan faire,
8. ab engan ses aigua raire,
9. puois qan l’a ras se remuda
10. e qier autrui cui saluda,
11. a cui es doussa e privada,
12. tant qe·l fols deven musaire.
13. Non puosc dompnas trobar gaire
14. que blancha amistatz no·i vair’e
15. a presen o a saubuda
16. n’aia vergoigna perduda,
17. si que la meins afrontada
18. n’a laissat cazer un caire.
19. Moillerat, per saint Ylaire,
20. son d’una foldat confraire,
21. q’entr’els es gerra moguda,
22. tals que cornutz s’acornuda,
23. e cogotz copatz-copaire:
24. puois eis la coa de[u] braire.
25. Tals cuid’esser ben gardaire
26. de la soa e de l’autrui laire,
27. c’atretals es de venguda
28. d’aicel de sai, que la cuida:
29. si l’us musa l’autre bada
30. et ieu sui del dich pechaire.
31. De nien sui chastiaire,
32. e de foudat sermonaire,
33. car puois la flam’es nascuda
34. del fol drut e de la druda
35. si·l fols art per l’abrasada,
36. no·n sui mal merens ni laire.
37. Tant cant bos jovens fon paire
38. del segle e fin’amors maire,
39. fon proeza mantenguda
40. a celat et a saubuda,
41. mas er l’ant avilanada
42. duc e rei et emperaire.
43. Q’ieu sui assatz esprovaire,
44. deffendens et enqistaire,
45. e vei cum jovens se tuda,
46. per que amors es perduda
47. e de joi deseretada,
48. e cum amars es cuiaire.
49. L’amors don ieu sui mostraire
50. nasquet en un gentil aire
51. el luoc on ill es creguda:
52. es claus de rama branchuda
53. e de chaut e de gelada,
54. q’estrains no l’en puosca traire.
55. Desirat per desiraire
56. a nom qui·n vol amor traire.