BdT 293.4 — Al prim comenz de l’invernailh

«Al prim comenz de l’invernailh» de Marcabru (BdT 293.4): text complet, 69 versos amb anotació sintàctica i bibliografia de referència.

Marcabru — BdT 293.4

  1. Al prim comenz de l’invernailh
  2. can plovon del bosch li glandus
  3. vueil c’om s’esgailh
  4. de proeza – qe non tressailh –
  5. e qe n’esti’ amanoïtz,
  6. aissi com s’era·l temps herbutz.
  7. Ladoncs qecs avols hom se plaing
  8. can ve·l temps frei e las palutz
  9. contra.l regaing,
  10. q’el s’avil’ e met en bargain,
  11. q’en estiu, qe non es vestitz,
  12. pot anar d’una peilla nutz.
  13. Aqist fan semblan ataïn
  14. al ser, can son plen e pagutz
  15. apres lo vin,
  16. e no lor ne sove·l matin,
  17. anz jura·l senros acropiz
  18. c’anc tan lagz temps non fon veütz.
  19. Joves homes de bel semblan
  20. vei per mal vestit deseubutz
  21. qe van guaban.
  22. Dizo: ‘mil esais encoguan
  23. farem cant lo temps er fluritz’.
  24. Mas lai rema lo gaps e·l brutz.
  25. Sil an l’usatge del gozo
  26. qe ditz cant sera a la lutz
  27. fara maio;
  28. pueis cant es lai qui l’en somo
  29. non er escoutatz ni auzitz.
  30. Anc per lui non fo dolatz fustz.
  31. Moilleratz, li meillor del mon
  32. foratz, mas chascus vos faitz drutz,
  33. qe vos cofon,
  34. e son acaminat li con,
  35. per q’es jovenz a fro[n] bauditz
  36. e vos en apel’ on cornutz.
  37. Pos vei qe d’ambas las partz nems
  38. bauzatz per lauzengiers becutz,
  39. an pur ensems
  40. – mas mai no·n puesc – la merd’ e·l fems,
  41. qu’en la sima e·n la raïtz,
  42. vei c’avoleza co’ e clutz.
  43. Lo pretz del dan e del barat
  44. davas on qe sia vengutz
  45. an moillerat
  46. et ieu ei lor o autreiat,
  47. per zo car i es jois jauzitz
  48. d’aqels, e donar mantengutz.
  49. C’a tort e adrei van desus
  50. per jovenz qe·s clama vencutz:
  51. lo mais e.l plus
  52. a penas a de qe·s gratus:
  53. capel a vestit d’avol critz,
  54. de mil de bos qe·n a agutz.
  55. Pozestatz non pot esser pros
  56. si non sap guerir d’un sanglot
  57. o d’una tos:
  58. li orfanel van guaran nos
  59. segon zo qe Marchabrus ditz,
  60. trian los granz mest los menutz.
  61. En Castella e·n Portegal
  62. voil trametre aqestas salutz –
  63. mas Dieus los sal –
  64. et en Barselona atretal
  65. . . . . . . . . . . . . . . . .
  66. e neis la valor son perdutz.
  67. En Gascognha sai, vas Orsal
  68. me dizon q’encreis uns petitz
  69. on trob azesc se soi perdutz.