BdT 293.31 — L’iverns vai e∙l temps s’aizina

«L’iverns vai e∙l temps s’aizina» de Marcabru (BdT 293.31): text complet, 85 versos amb anotació sintàctica i bibliografia de referència.

Marcabru — BdT 293.31

  1. L’iverns vai e∙l temps s’aizina
  2. e reverdejo∙il boisso
  3. e par la flors en la ‘spina
  4. don s’esjauzon l’auzelo;
  5. Ai!
  6. ja devenon d’amor gai,
  7. c’usqecs vas sa par s’atrai
  8. Hoc,
  9. segon plazensa corina.
  10. Lo freig frang e la bruïna
  11. contra la gentil sazo;
  12. pel plais e per la gaudina
  13. aug del chant la contenzo;
  14. Ai!
  15. si∙m met de trobar em plai
  16. e dirai d’amor con vai,
  17. Hoc,
  18. si∙m vueil, e con revolina.
  19. Amars vai et ataïna
  20. tric ab coratge frico
  21. d’una voluntat conina
  22. qe s’enpren del fuec felo.
  23. Ai!
  24. Non es nuls hom ses [i] chai,
  25. daveras o per essai,
  26. Hoc,
  27. non lais del pel en l’arzina.
  28. So cembel mou cor traïna
  29. de son agag lo brico,
  30. c’ab sospirar l’en raïna,
  31. entrebrescat hoc ab no.
  32. Ai!
  33. Mueu talan blanc, bru e bai;
  34. ab «si farai! non farai!»
  35. Hoc,
  36. fai al fol maigrir l’eschina.
  37. Bon’amors porta meizina
  38. per guerir son compagnio;
  39. amar los senz disciplina
  40. e∙ls met a perdicio.
  41. Ai!
  42. Tan can l’avers dura, fai
  43. al fol semblan d’amor jai,
  44. Hoc,
  45. e cant l’avers fail camina.
  46. Domna no sap d’amor fina
  47. c’ama girbaut dinz maio,
  48. mas sa voluntat mastina
  49. con fai lebreir’ ab gozo.
  50. Ai!
  51. D’aqi nasso∙il ric savai,
  52. c’us no∙n fa condug ni plai,
  53. Hoc,
  54. si con Marcabraus declina.
  55. Soudouz, esta en la cozina
  56. e toca∙l foc al tuzo
  57. e beu lo fum de la tina
  58. de si donz na Bona∙ilh-fo.
  59. Ai!
  60. Eu sai con sojorn’e jai
  61. e part lo gra e∙l balay;
  62. Hoc,
  63. so segnor engirbaudina.
  64. Qui bon’amor avezina
  65. ni viu de sa liurazo,
  66. honors e valors l’aclina,
  67. e pretz, senes ochaio.
  68. Ai!
  69. Talan si al dig verai
  70. e no∙il cal aver esmai
  71. Hoc,
  72. del trutbulurut n’Aiglina
  73. Jamai no farai plevina
  74. eu per la troba n’Eblo,
  75. car s’entensa folatina
  76. manten encontra razo.
  77. Ai!
  78. Q’eu dic e diz et dirai
  79. q’escas es et amor brai,
  80. Hoc,
  81. e qi blasma amor bozina.
  82. Q’e∙n dic e dis et dirai
  83. q’escas es et amor brai,
  84. Hoc,
  85. e qi blasma amor bozina.