BdT 293.28 — Lanquan fuelhon li boscatge

«Lanquan fuelhon li boscatge» de Marcabru (BdT 293.28): text complet, 45 versos amb anotació sintàctica i bibliografia de referència.

Marcabru — BdT 293.28

1. Lanquan fuelhon li boscatge
2. e par la flors en la prada,
3. m’es belh dous chant per l’ombratge
4. que fan desus la ramada
5. l’auzelet per la verdura;
6. e pus lo temps si melhura
7. elhs an lur joya conquiza.
8. Ara perdon l’alegragge
9. pel frey e per la gilada,
10. mas ieu ai pres tal uzatge
11. totz jorns chant, qu’ara m’agrada,
12. e, fassa caut o freidura,
13. trastot m’es d’una mezura
14. amors e joys d’eyssa guiza.
15. On plus n’ay melhor coratge
16. d’amor, mielhs m’es deslonhada.
17. Per qu’ieu no·m planc mon dampnatge?
18. Qu’aitals es ma destinada,
19. que joys e bon’ aventura
20. mi tolh un pauc de rancura,
21. que m’es ins el cor assiza.
22. Selha que·m degra messatge
23. enviar de ss’encontrada,
24. o tem bayssar son paratge
25. o s’es ves mi azirada,
26. o no vol o no endura:
27. ben leu orguelhs o non-cura
28. s’es entre nos entremiza.
29. Ges no·l sera d’agradatge
30. la merces qu’ieu l’ai clamada:
31. s’ieu lieys pert per son folhatge,
32. ieu n’ay autra espiada,
33. fina, esmerada e pura,
34. qu’aitals amors es segura
35. que de fin joy es empriza.
36. Per lieys am tot son linhatge,
37. e totz selhs que l’an lauzada,
38. quar anc no·m fes estranhatge,
39. mas quora.m vi, fon privada:
40. quar ieu l’am senes falsura,
41. ja no·m deu esser escura
42. d’aquo don tan l’ay enquiza.
43. Be·m tengratz per folhatura,
44. si be·m fai e mielhs m’ahura,
45. s’ieu ja m’en planc quar l’ay viza.