BdT 29.11 — Lancant son passat li giure

«Lancant son passat li giure» de Arnaut Daniel (BdT 29.11): text complet, 52 versos amb anotació sintàctica i bibliografia de referència.

Arnaut Daniel — BdT 29.11

1. Lancant son passat li giure
2. e no·i remman puois ni comba
3. et el verdier la flors trembla
4. sus en l'antrecim on poma,
5. <e> la flors e·l chant e·ill cler quil
6. ab la sazon doucha e coincha
7. m'enseignon c'ab ioi m'aponga,
8. chai el tems intrant abril.
9. Ben greu trob'hom ioi desliure,
10. c'a tanta part volv en comba
11. falsa amors, que no s'asembla
12. lai on leieutaz asoma:
13. qu'eu non trob ges doas en mil
14. senz falsa paraula longa,
15. e puois c'a travers non ponga
16. e non torn sa chardat vil.
17. Tuit li plus savi^en vaut iure
18. senz moilol e senz retomba;
19. cui il ginoset esclemb<l'>a
20. la crin que·ill pent a la coma
21. e plus pres li bruit de l'ausil
22. on plus gentet s'en deslonga,
23. e·l folz cre meilz d'una monga
24. qu<e> a simple cor gentil.
25. Senz fals'amor cuidei viure,
26. mas ben vei c'un dat mi plomba
27. cant eu meilz vei qu'il m'o embla,
28. car tuit li legat de Roma
29. no son ges de sen tan sotil
30. que, s'adevi sa menzogna
31. que tant soaument caloigna,
32. m'en puosc'om falsar un fil.
33. Qui amor sec, per tal·s liure:
34. so cuc teigna per columba;
35. se·il o di ni ver li sembla
36. faza·il plan del Puoi de Doma;
37. cant d'el plus brueb es, tan s'apil;
38. si co·l proverbis s'aconga,
39. si·l trai l'ueill, sol puois lo·li onga,
40. sufre e segua ab cor humil.
41. Ben conosc senz art d'escriure
42. qui plan'o qui es de lomba,
43. qu'eu sai drut que si asembla
44. don blasm'es leis, el col groma:
45. qu'eu n'ai ia perdut ric cortil
46. car non voill iais ab vergonga
47. ni·l blasmes ab l'onor ionga,
48. per qu'eu loin son segnoril.
49. Bertran, no cre de chai lo Nil
50. mais tant de fin ioi m'aponga
51. tro ai on lo soleiz planga
52. [.....................] plovil.