BdT 262.6 — Quan lo rossinhols el foillos

«Quan lo rossinhols el foillos» de Jaufre Rudel (BdT 262.6): text complet, 42 versos amb anotació sintàctica i bibliografia de referència.

Jaufre Rudel — BdT 262.6

1. Quan lo rossinhols el foillos
2. dona d'amor e·n quier e·n pren,
3. e mou son chan jauzens joios
4. e remira sa par soven,
5. e·l riu son clar e·l prat son gen,
6. pel novel deport que reingna,
7. mi ven al cor grans jois jazer.
8. D’aquest’amor son cochos
9. que, quant eu vauc vas leis corren,
10. vejaire m’es qu’a reusos
11. m’en torn e qu’ela m’an fugen.
12. E mos cavals i cor tan len,
13. greu er c’uimais i ateingna
14. s’Amors no la·m fa remaner.
15. De tal domna sui cobeitos,
16. a cui non aus dir mon talen;
17. ans, quant remire sas faisos,
18. totz lo cors m’en vai esperden.
19. E aurai ja tan d’ardimen
20. que l’aus dire per sieu mi teingna,
21. pois d’als non ll’aus merce querrer?
22. A! com son siei dit amoros
23. e siei fait son fin e valen:
24. qu’anc non nasquet sai entre nos
25. neguna c’aia cor tan gen;
26. graille es, fresc’ab cors plazen,
27. e non cre genser s’enseingna,,
28. ni anc homs non la poc vezer.
29. Amors, alegre·m part de vos
30. per so car vau mon mieillz queren;
31. e son d’aitan aventuros
32. qu’enquar n’aurai mon cor jauzen:
33. la merce de mon Bon Guiren,
34. que·m vol e m’apel’ e·m deigna
35. e m’a tornat en bon esper.
36. E qi sai reman delechos
37. e Dieu non sec en Belleen,
38. no sai com sia ja mais pro
39. ni cum ja venh’a guerimen;
40. qu’ieu crei e sai, mon escïen,
41. que sel cui Jesus ensenha
42. segu’ escola pot tener.