BdT 183.11 — Pos vezem de novel florir

«Pos vezem de novel florir» de Guglielmo IX (BdT 183.11): text complet, 50 versos amb anotació sintàctica i bibliografia de referència.

Guglielmo IX — BdT 183.11

1. Pos vezem de novel florir
2. pratz, e vergiers reverdezir,
3. rius e fontanas esclarzir,
4. auras e vens,
5. ben deu chascus lo joi jauzir
6. don es jauzens.
7. D’amor non dei dire mas be.
8. Quar no·n ai ni petit ni re?
9. Quar ben leu plus no m’en cove!
10. Pero leumens
11. Dona gran joi qui be·n mante
12. Los aizimens.
13. A totz jorns m’es pres enaisi
14. c’anc d’aquo c’amei no·m jauzi;
15. ni o farai, ni anc non o fi;
16. c’az essiens
17. fauc, maintas ves que·l cor me ditz:
18. “Tot es niens”.
19. Per tal n’ai meins de bon saber
20. quar vueill so que non puesc aver,
21. e si·l reprovers me ditz ver
22. certanamens:
23. “A bon coratge bon poder”,
24. qui·s ben sufrens.
25. Ja no sera nuils hom ben fis
26. contr’amor, si non l’es aclis,
27. et als estranhs et als vezis
28. non es consens,
29. et a totz sels d’aicels aizis
30. obediens.
31. Obediensa deu portar
32. a maintas gens, qui vol amar;
33. e cove li que sapcha far
34. faitz avinens
35. e que·s gart en cort de parlar
36. vilanamens.
37. Del vers vos dic que mais ne vau
38. qui be l’enten, e n’a plus lau:
39. que·ls motz son faitz tug per egau
40. comunalmens,
41. e·l son, et ieu meteus m’en lau,
42. bos e valens.
43. A Narbona, mas ieu no·i vau,
44. sia·l prezens
45. mos vers, e vueill que d’aquest lau
46. me sia guirens.
47. Mon Esteve, mas ieu no·i vau,
48. sia·l prezens
49. mos vers, e vueill que d’aquest lau
50. me sia guirens.